Siglir tar il cuntegn
Inhalt

Svizra Dubel uschè blers concurs

Ils concurs da firmas sco era da privats èn s’augmentads l’emprima mesadad da l'onn. En tut ha quai dà quasi 3’400 concurs d'interpresas, quai che munta ad in augment da 4,3%. Ils concurs privats èn s'augmentads per passa 7% sin bunamian 4'100 cas.

Uffizi da concurs.
Legenda: Il 2017 vegn a vegnir in onn da record tar las annunzias da concurs, tant d'interpresas sco da privats. Keystone

Per l’entir onn quinta la Federaziun da crediturs «Creditreform» cun stgars 6’800 concurs, quai che fiss in augment per il dubel. L’augment dals concurs d’interpresas saja en vista al carschen marcant d’interpresas novas nagina surpraisa, hai num en la communicaziun. Tar ils concurs quinta «Creditreform» las insolvenzas d’interpresas ma era publicaziuns da concurs pervi da mancos en l’organisaziun. Uschia quinta la federaziun cun stgars 2'000 cas da stizzadas ord il register da commerzi pervi da tals mancos en l'organisaziun. Las «vairas» insolvenzas pudessan crescher fin la fin da l'onn sin 4’860 cas scriva «Creditreform».

Concurs privats creschan marcant

Era ils concurs da persunas privatas èn creschids marcant cun in augment da 7,2% sin quasi 4’100 cas, per l’entir onn quinta «Creditreform» cun in augment da 10%. Tar ils concurs privats vegnan quels sin bunamain 8’200 concurs il 2017, quai che munta ad in nov record, scriva «Creditreform».

RR novitads 11:00