Siglir tar il cuntegn

Header

Navigaziun

Purtret da chalzers falsifitgads sin in mantun.
Legenda: Er chalzers èn tranter las chaussas che vegnan falsifitgadas. Keystone
cuntegn

Svizra Duana ha confiscà 40% pli paucas falsificaziuns

L'onn passà han ils uffizis da duana confiscà radund 1'400 falsificaziuns, quai èn 40% pli pauc che l'onn avant e mez uschè bler sco anc avant quatter onns.

Il pli savens cumpran turists en l'exteriur tastgas e bursas falsifitgadas, sco quai che la plattafurma «Stop Piracy» (quai che munta stop pirateria) ha communitgà sin fundament da las cifras da la Confederaziun. Era popular sajan copias da marcas da vestgadira, accessoires, uras, bischutaria ed egliers. Bunamain in terz da la rauba confiscada è vegnida da la Tirchia.

«Stop Piracy» è da l'avis che la sminuziun giaja enavos sin acziuns da sensibilisar la glieud als ports aviatics svizzers avant las vacanzas. Cun placats avant la duana è vegnì fatg cler ch'importar rauba falsifitgada è scumandà en Svizra. Tgi ch'importa tuttina da questa rauba sto quintar cun quai che la rauba vegn confiscada e destruida da la duana. Plinavant po il producider pretender indemnisaziuns.

Vendita sur internet è dentant tschertgada

Pli pauc scrupels paran ils Svizzers e las Svizras d'avair tar cumprar la rauba falsifitgada en l'internet. L'onn passà han las duanas tegnì enavos 3'125 spediziuns, quai che correspunda circa a la media dals ultims onns. Sur tut persunas privatas hajan empustà rauba falsifitgada. En la mesadad dals cas sa tracti dad uras u bischutaria, suandà da tastgas e bursas. Ina gronda part dals products deriva da l'Asia.

RR novitads 12:00