Lavurar durant las vacanzas dastga giuventetgna en bleras clamadas pir davent da 15 onns. En il service u en kinos perfin pir cun 16 onns. E per lavurar en ina disco u sin ina bar ston ins esser maioren. I dettia dentant er plazzas ch'èn adattadas per persunas pli giuvnas, ha Lulzana Musliu ditg envers SRF Espresso. Quai saja per exempel guardar d'uffants pitschens u ir a reparter prospects per insatgi.
Concernent la paja na dettia nagina lescha, sco Lulzana Musliu declera. L'uniun sindicala svizra propona dentant ina paja da 15 francs l'ura per giuventetgna durant ina lavur da stad.
Impurtant è er il temp da lavur per la giuventetgna. I dastgian maximal lavurar uschè bler sco las persunas creschidas. Dentant maximal 9 uras per di. E fin la vegliadetgna da 16 n'èsi betg lubì da lavurar suenter las 20:00 la saira.
Ulteriurs tips
Lulzana Musliu da la Pro Juventute propona plinavant er da guardar ch'ins survegnia in contract da lavur durant il temp ch'ins giaja a lavurar. Uschia na dettia betg confusiuns. E tge ch'ins na dastgia er betg emblidar è ch'ins haja er dabun da vacanzas durant ina plazza en las vacanzas.