Siglir tar il cuntegn

Header

video
Livia Leu: «Ina cunvegna da basa è necessaria»
Or da News-Clip dals 14.10.2020.
laschar ir
cuntegn

Dossier UE en novs mauns Livia Leu maina en il futur las tractativas

Midada a la testa da las tractativas cun l'Uniun europeica: A partir d'immediat daventa Livia Leu schefnegoziadra. Sco il Cussegl federal ha decis la mesemna, surpiglia la Grischuna da 59 onns la direcziun per affars europeics e survegn il titel da secretaria da stadi.

Midada a la testa da las tractativas cun l'Uniun europeica: A partir d'immediat daventa Livia Leu schefnegoziadra. Sco il Cussegl federal ha decis la mesemna, surpiglia la Grischuna da 59 onns la direcziun per affars europeics e survegn il titel da secretaria da stadi.

Livia Leu è dapi il 2016 la 5avla topdiplomata che surpiglia la responsabladad per il dossier da l’UE. Avant ella e Balzaretti han gia Yves Rossier, Jacques de Watteville e Pascale Baeriswyl responsà questa fatschenta spinusa. Livia Leu sa mova dapi decennis sin il parchet diplomatic. Dapi il 1989 è ella en servetsch da la Confederaziun.

Livia Leu è creschida si ad Arosa, sco figlia da l'hotelier Hans C. Leu. Suenter ch'ella ha fatg la matura a la Scola chantunala a Cuira, ha ella studegià giurisprudenza a las universitads da Turitg e da Losanna.

In um che perda bler

Il diplomat svizzer Roberto Balzaretti.
Legenda: Keystone

Roberto Balzaretti aveva negozià il 2018 la cunvegna da basa cun l’UE, quella è dispitaivla en Svizra e na cuntanschess actualmain betg pli ina maioritad. Uss perda il Tessinais da 55 onns ses post sco il pli aut e pli impurtant diplomat svizzer, e ses titel da secretari da stadi. El surpiglia da Livia Leu il post d'ambassadur a Paris.

Dapli schlantsch en las tractativas cun l’UE

Las partidas politicas vesan ina schanza che ussa pudess vegnir moviment en la situaziun bloccada da las tractativas cun la cumissiun da l’UE. Ils sindicats da lur vart speran che las posiziuns dals differents acturs vegnian resguardadas meglier, rapporta l’agentura da novitads Keystone-SDA.

L’UE haja prendì enconuschientscha da la nominaziun da Livia Leu, ha scrit il pledader da la cumissiun da l’UE sin Twitter. El ha repetì l’appel da la cumissiun da l’Uniun europeica che la Svizra stoppia, senza retard, prender mesiras concretas per far progress tar la suttascripziun da la cunvegna da basa.

RTR novitads 14:00

Artitgels legids il pli savens

Scrollar a sanestra Scrollar a dretga