Siglir tar il cuntegn

Svizra Donns massivs suenter randal a Turitg

Radund 60 demonstrants da la sanestra extrema èn ids tras las vias da Turitg il venderdi saira. Ils mascrads han tenor la polizia chaschunà donns materials da bler dapli che 200’000 francs. Nov persunas èn vegnidas arrestadas.

Ils donns materials dal til «Saubannerzug» muntan a dapli che 200'000 francs.
Legenda: Ils donns materials dal til «Saubannerzug» muntan a dapli che 200'000 francs. Keystone

Activists da la sanestra extrema han fatg currer la polizia en ils districts 3 e 4 da Turitg il venderdi saira. Els han tranter auter dà fieu in vehichel e plirs containers, sco la polizia da la citad da Turitg scriva. Plinavant han els demolì numerusas fanestras e tartagnà fatschadas. Ils donns materials muntan a sur 200’000 francs.

Ils participants a la demonstraziuns sajan stads fitg pronts da commetter acts violents ed hajan bittà crappa e fieus artifizials sin las forzas d’intervenziun, scriva la polizia vinavant. Lezza ha reagì cun materias stimulantas e ballins da gumma. Nov persunas èn vegnidas arrestadas – set umens e duas dunnas.

Duas persunas blessadas

Ina dunna ed in um èn vegnids transportads en l’ospital pervi da blessuras. La dunna haja taglia ses agen maun, l’um saja vegnì blessà en fatscha cun in fieu artifizial ord las atgnas ritschas.

L’acziun dals sanesters extrems dus dis avant il prim da matg è tenor ils organisaturs in’acziun da protest «cunter augment da la valur, spustament e repressiun».

RR novitads 06:00