Siglir tar il cuntegn

Header

cuntegn

Svizra Donns da milliuns per vigna la pli auta en Europa

Sco quai che SRF rapporta ha la ferma plievgia dal schaner chaschunà bovas e fatg donns d'almain 4 milliuns francs.

  • A Visperterminen è la pli auta vigna da l'Europa.
  • Plievgia ferma durant il schaner ha chaschunà gronds donns.
  • Ina part dal bain cultural en il Vallais è destruì tras bovas.
  • Ils donns muntan ad almain quatter milliuns francs.

Ils pli gronds donns haja quai dà giudim il vitg, nua che radund 500 meters cubic terren sajan sbuvads aval, ha ditg il president da vischnanca da Visperterminen. Era passa 200 mirs sitgs sajan destruids. Las vignas da Visperterminen ed ils mirs sitgs valan sco bain cultural d’impurtanza dal chantun Valais.

Mirs sitgs destruids

La consternaziun è gronda. Ils mirs èn vegnids bajegiads a maun avant passa tschient onns dals tats e basats, e quai tut senza maulta. Perquai valan ils mirs sco bain cultural d'impurtanza dal Valais. Per mantegnair il monument caracteristic avevan il chantun Valais e la Confederaziun mess a disposiziun il 2011 radund 7,6 milliuns francs per sanar ils mirs.

Radund la mesadad da las lavurs da sanaziun èn finidas. Ed ussa quai. Radund dus kilometers dals en tut radund 47 kilometers mirs sitgs èn vegnids destruids. Ils donns da radund 4 milliuns na possia la vischnanca da Visperterminen betg purtar sulet. La vischnanca ha dumandà per agid il chantun e la Confederaziun. Il rest emprovan els da cuvrir cun agid d'autras organisaziuns.

Emprimas lavurs marschan gia

Malgrà che la finanziaziun n'è anc betg sclerida dal tuttafatg, vegnan ils emprims mirs gia puspè reparads. Enfin che tuttas lavurs vi dals mirs sajan finidas, vegnia quai a durar plirs onns, uschia Richard Stoffel, il maister viticultur.

RR novitads 11:00

Artitgels legids il pli savens