Siglir tar il cuntegn
Inhalt

Svizra Dispita da cunfinaris: Svizra ed Italia avant cunvegna

Suenter lungas tractativas han la Svizra e l'Italia suttascrit ina cunvegna co ils cunfinaris hajan da pajar taglia. Tenor quella impona il stadi, nua ch'il cunfinari viva, la taglia sin las entradas. Dentant survegn il stadi en il qual il cunfinari lavura fin 70% da questas entradas.

colonnas dad autos avant il cunfin svizzer
Legenda: Situaziun quotidiana la damaun en il Tessin: Millis cunfinaris van a la lavur en Svizra. Keystone

Uschia duai vegnir evità ch'ils cunfinaris stoppian pajar dublamain taglia. La cunvegna vala da nov per tut ils cunfinaris che vivan damain che 20 kilometers davent dal cunfin e che turnan mintga di a chasa.

Radund 60'000 cunfinaris talians lavuran en il Tessin, ulteriurs en il Grischun ed il Vallais. Els profiteschan da custs da viver relativamain bass a chasa e da bunas pajas en Svizra, malgrà ch'il Tessin ha pajas ch'èn cleramain sut la media svizra.

Il secretari dal stadi, Jacques de Watteville ha ditg: «La nova cunvegna lubescha da cuntanscher ina meglra imposiziun da taglia. Dapli daners per ils chantuns ed er dapli daners per l'Italia. La cunvegna lubescha era ina meglra controlla dals cunfinaris.»

Concretamain pon ils chantuns cunfinars salvar radund 70% da las taglias dals cunfinaris, quai èn radund 10% dapli che fin uss. L'Italia pretenda ussa sez la taglia dals cunfinaris e quai uschè aut, ch'els n'han nagins avantatgs pli envers ils Talians che lavuran en l'agen pajais.

Il nov contract remplazza quel dal 1974. El sto anc vegnir approvà dals parlaments dad omadus stadis, e quai pudess anc durar almain 2 onns. L'Italia ha resalvas e pretenda che la cunvegna giaja sulet en vigur sch'i dat ina realisaziun da l'iniziativa da l'immigraziun da massa ch'è cumpatibla cun l'UE.

RR novitads 17:00