Siglir tar il cuntegn

Header

L'ovra atomara Beznau.
Legenda: Sulet l'ovra atomara da Beznau 1 custa da dismetter passa 5,6 milliardas francs. Keystone
cuntegn

Svizra Dismetter ovras atomaras custa dapli che quintà

Prender ord funcziun las ovras atomaras svizras ed allontanar il rument radioactiv vegn adina pli char. Il fond da serrada ed il fond d'allontanament quintan cun custs totals da 22,8 milliardas francs. La cifra deriva dal studi da custs 2016 da Swissnuclear che vegn fatgs mintga tschintg onns.

Ils custs èn uschia per 10% pli auts che la calculaziun dal 2011. Il studi nov duai uss vegnir examinà dad experts independents, quai vegn probabel a durar in onn. Gia il 2011 cura ch’ils custs eran vegnids stimads sin 20,7 milliardas francs eran els vegnids auzads dapi il 2006 per radund 3,6 milliardas francs. Uschè ditg che las ovras atomaras èn en funcziun, pajan ils gestiunaris ils custs da serrada directamain. Fin l'onn 2015 è quai stà 5,5 milliardas francs.

Sulet ovra Beznau custa 5,6 milliardas francs

Da prender ord funcziun l’ovra atomara da Beznau vegn probabel a custar 5,6 milliardas francs. Cun integrar ils custs per il manaschi posteriuramain vegnan ils custs stimads sin radund 6 milliardas francs. Quai èn custs per 6,4% pli auts che anc il 2011, scriva il concern d’energia Axpo oz a las medias.

Mühleberg custa 3 milliardas francs

Ils custs pe dismetter l'ovra da Mühleberg vegnan stimads sin 3,06 milliardas francs. La finanziaziun saja gia uss garantida, scriva il concern d'energia BKW.

Cumpart vida ovras atomaras

Ovra atomara Mühleberg
BKW 100%
Ovra atomara Gösgen
Alpiq 40%, NOK 25%, CWE 12,5%, EWZ 15%, EWB 7,5%
Ovra atomara Leibstadt
Alpiq 27,4%, Axpo Power SA 22.8%, CKW 13,6%, Axpo Trading SA 16,3%, BKW 9,5%, AEW 5,4%
Ovra atomara Beznau 1+2
Axpo 100%

RR novitads 08:00