Siglir tar il cuntegn
Inhalt

Svizra Discussiun da burca: Protestant suprem per scumond da sa velar

Ina retschertga ha mussà ch’ina gronda part la populaziun svizra giess d’accord cun in scumond da burca. Uss fa er Gottfried Locher, il president da la Federaziun da las baselgias evangelicas da la Svizra, part da la discussiun e pretenda in scumond general da sa velar.

La fatscha saja da mussar en la publicitad, di Gottfried Locher.
Legenda: La fatscha saja da mussar en la publicitad, di Gottfried Locher. Keystone

Mintgina e mintgin duai mussar sia fatscha en la publicitad. Cun quest’argumentziun pleda il president da la Federaziun da las baselgias evangelicas da la Svizra, Gottfried Locher, per in scumond da sa velar che cumpiglia er la zuppentada da la fatscha islamica.

En intervista cun las gasettas «Tages-Anzeiger» e «Der Bund» da glindesdi ha Locher ditg ch’i giaja ord sia vista en la discussiun da burca per il fatg sch’insatgi mussia sia fatscha en la publicitad, ed uschia er sia identitad. «Tgi che na mussa betg sia fatscha renunzia l’impurtant da sia capacitad d’identitad.» Ord quest motiv è el da l’avis ch’in «scumond general da sa velar è meglier ch’in scumond specific da burca».

El saja bain cunter prescripziuns da vestgadira. «Ma nus faschain cunfins, e quai en omaduas direcziuns», ha ditg il plevon. Per raschuns moralas na giajan ins betg niv sin via. «Da l’autra vart segirain nus ch’insatgi che sa mova en la publicitad posseda in’identitad.» Latiers tutgia quai da mussar sia fatscha.

«Expressiun d’in’ideologia»

Ord la vista da Locher sajan religiun e burca da separar. Zuppentar la fatscha cun ina burca na saja betg in segn caracteristic da l’entir islam. Latiers è el sa referì sin decleraziuns d’auts spirituals islamics. Tenor lezs n’haja il vel da fatscha da far nagut cun l’islam. Purtar ina burca saja plitost «expressiun d’in’idologia che d’ina teologia.»

In scumond da burca, sco in’iniziativa dal comité d’Egerkingen prenda en mira, giauda grond sustegn tar votantas e votants. Tenor in’enquista per incumbensa da la «SonntagsZeitung» e «Le Matin Dimanche» èn 71% persuenter.

RR novitads 08:00