Igl è in resultat magher che Regula Rytz ha da magunar oz. Be stgars tut ils commembers da la fracziun da la Partida socialdemocratica e da l'atgna partida ha ella – u la candidatura verda – pudì persvader oz. Tenor Regula Rytz è il problem principal da questas elecziuns stà, che nagin sez era liber. E da betg reeleger cussegliers u cusseglieras federalas en uffizi n'haja betg tradiziun en Svizra.
La populaziun ha mussà en las elecziuns naziunalas che la politica sto vegnir pli verda. Quai èn pretaisas che votantas e votants han fatg envers nus e quellas vulain nus era purtar en la regenza.
Tant pli impurtant saja quai uss, da discurrer e debattar sur dad ina nova furmla magica per il Cussegl federal. In signal che las autras partidas hajan dà ed ina discussiun che la presidenta dals Verds, Regula Rytz, beneventa.
Entant sto la Partida verda vinavant empruvar da chattar maioritads en il parlament. Las pretaisas per in sez en il Cussegl federal restian però vinavant actualas e tar mintga nova elecziun vegnian ils Verds era a preschentar lur strategia. Quai ha ditg la mesemna il schef da fracziun da la partida, Balthasar Glättli. La populaziun Svizra haja tar las ultimas elecziuns dà in cler signal per in midament en direcziun «verd» e quel piglian els serius, agiunscha Glättli.
RTR actualitad 17:00