Siglir tar il cuntegn
Inhalt

Svizra Dischoccupaziun: dapli en Svizra, damain en il Grischun

La quota da dischoccupaziun è creschida l'avust sin 3,2% (fanadur 3,1%). Bunamain 137'000 persunas eran la fin da l'avust senza lavur, quai communitgescha il secretariat statal per economia SECO. Cumpareglià cun il fanadur èn quai radund 3'000 persunas senza lavur dapli.

portagasettas cun 5 gasettas ina sut l'autra
Legenda: Plazzas èn tschertgadas, la quota da dischoccupaziun è s'augmentada. Keystone

L'augment è cunzunt d'attribuir als giuvenils e giuvens creschids, sco il Seco scriva.
Il dumber da las persunas tranter 15 e 24 onns senza lavur è creschì da radund 17'000 sin passa 20'500.

Persuenter è sa reducida la dischoccupaziun tar persunas sur 50 onns. En la vegliadetgna tranter 25 e 49 onns è la dischoccupaziun restada stabila.

L'avust 2014 era la quota da dischoccupaziun tar 3,0%.

Damain dischoccupads en il Grischun

En il Grischun eran la fin d'avust 1424 persunas senza lavur. Quai èn 40 damain ch'il fanadur e correspunda ad ina quota da dischoccupaziun dad 1,3%. Ils pli blers dischoccupads, numnadamain 292 avevi tenor l'Uffizi per industria, mastergn e lavur en la gastronomia.

L'avust passà han plinavant 7 manaschis cun 120 collavuraturs introducì lavur curta. Il fanadur eran anc 9 manaschis cun 140 collavuraturs pertutgads.

RR novitads 08:00