- Whatsapp è ils davos dis stà en la critica, perquai che l'applicaziun mida las cundiziuns d'utilisaziun.
- A l'entschatta stuevan ins acceptar quellas novas cundiziuns enfin ils 8 da favrer per che l'applicaziun funcziuneschia anc.
- Pervia da la critica dals davos dis ha Whatsapp prolunghà il termin fin ils 15 da matg.
Stizzar Whatsapp u betg? Ina dumonda che ha fatschentà blers utilisaders e bleras utilisadras ils davos dis. La populara applicaziun da messadis Whatsapp è numnadamain stada fitg en la critica. L'app mida las cundiziuns d'utilisaziun. Quai munta tranter auter che Whatsapp po dar vinavant dapli datas al concern mamma Facebook. En l'internet curseschan actualmain bleras theorias ed era appels da stizzar l'applicaziun.
Novas cundiziuns d'utisilaziun? Cun acceptar las novas cundiziuns d'utilisaziun po Whatsapp rimnar uschenumnadas metadatas. Metadatas ein per exempel il status, cura ch'ina persuna ha tramess in messadi, da nua ed a tgi. Il cuntegn dals messadis resta dentant secret. Tge datas che vegnan exact rimnadas cun las novas cundiziuns n'è betg cler.
Alternativas? Pervia da las malsegirtads èn autras applicaziuns da messadis fitg dumandadas. Per exempel la app ord la Svizra Threema u la app Signal. Per duvrar la applicaziun Threema dovra il utilisader gnanc ina numera da telefon. La app custa dentant.
