Siglir tar il cuntegn

Svizra Didier Cuche culpabel per delicts da traffic

L'anteriur skiunz ha survegnì in chasti da daners cundiziunà. Quai pervi da pliras cuntravenziuns cunter la lescha davart il traffic sin via. El ha stuì sa responsar pervi d'in accident d'auto il zercladur dal 2014. Lura era el collidà cun 2 posts da via cura ch'el ha vulì guntgir in animal.

purtret da Didier Cuche
Legenda: La dretgira a La-Chaux-de-Fonds ha sentenzià Didier Cuche. Keystone

L'avust 2015 è Cuche sa preschentà avant la dretgira a La-Chaux-de-Fonds per pudair raquintar sia versiun. El ha dà tiers d'avair fatg in simpel accident individual, el na saja dentant betg stà alcoholisà. L'anteriur skiunz ha declerà ch'el haja vulì annunziar ses accident in di pli tard. La polizia ha dentant pudì tiers el avant e denunzià el.

Jau hai fatg l'experientscha che la dretgira ha taxà per part auter mes falliment en connex cun in incap en il traffic da via.
Autur: Didier Cucheanteriur skiunz

La dretgira da Montagenes e Val-de-Ruz ha declerà culpant Cuche d'avair pers la controlla da ses vehichel e d'in'infurmaziun manglusa da la polizia. Vitiers haja Cuche bandunà il lieu da l'accident avant che la polizia è stada là.

Multa da 2'000 fr

La dretgira ha sentenzià Cuche ad ina multa da 2'000 francs ed in chasti pecuniar da 20 taxas per di. Il procuratur public aveva renfatschà a Cuche en total set surpassaments da la lescha da traffic sin via, tranter auter d'esser charrà cun alcohol. El ha pretendì ina multa da 6'900 francs sco er in chasti da daners cundiziunà da 30'000 francs.

Didier Cuche ha communitgà ch'el haja fatg l'experientscha che la dretgira haja mo parzialmain taxà tuttina sco el ses falliment. El è dentant sa mussà cuntent che la renfatscha d'esser charrà cun alcohol n'è betg pli stà tema.

RR novitads 12:00