Siglir tar il cuntegn
cuntegn

Svizra Didier Burkhalter sa retira sco cusseglier federal

Il minister da l'exteriur Didier Burkhalter sa retira sco cusseglier federal sin ils 31 d’october da quest onn. Quai ha il president dal Cussegl naziunal Jürg Stahl annunzià oz en il parlament.  

Dapi il 2009 sesa Burkhalter ch'è dal chantun Neuchâtel en il Cussegl federal. Il 2014 è el stà president da la Confederaziun. Suenter passa 30 onns en la politica e da quai 8 onns en il Cussegl federal, saja quai uss temp da far ina midada, ha Burkhalter scrit en sia brev d’abdicaziun prelegida en il Cussegl naziunal dal president Stahl. Plans concrets na dettia quai anc betg, scriva Burkhalter.

Didier Burkhalter è naschì ils 17 d’avrigl 1960 ad Auvernier en il chantun Neuchâtel. Suenter ha el terminà ils studis d’economia a l’universitad da Neuchâtel. El è stà en differentas funcziuns en l’universitad ed en l’economia privata. El è maridà ed ha trais uffants.

Dapi il 1985 commember dals liberal-democrats

Dapi il 1985 è Burkhalter commember da la partida liberal-democratica. Il 1991 è el vegnì elegì en la regenza da la citad da Neuchâtel a la quala el ha fatg part fin il 2005. Il 2003 era Burkhalter vegnì elegì en il Cussegl naziunal ed il 2007 alura en il Cussegl dals chantuns.

Parsura da la OSCE

Il 2014 è stà l’onn culminant en la carriera politica da Burkhalter. Quel onn è el stà president da la Confederaziun ed il medem mument era parsura da l’OSCE, l'Organisaziun per la segirezza e la collavuraziun en l'Europa. Surtut era Burkhalter vegnì activ en il conflict en l’Ucraina dal ost.

RR novitads 16:00