Siglir tar il cuntegn
cuntegn

Svizra DEZA preschenta finamiras è sfidas per l’onn 2015

L’emprima prioritad per la Direcziun da svilup e collavuraziun DEZA è e resta il cumbat cunter la povertad.

Manuel Sager, directur da la DEZA, e Maya Tissafi, la vicedirectura.
Legenda: Manuel Sager, directur da la DEZA, e Maya Tissafi, la vicedirectura. Keystone

Las sfidas èn quest’onn spezialmain grondas, di il nov directur da la DEZA, Manuel Sager. Pervi da tut ils conflicts e las crisas actualas eran l’onn 2014 radund 57 milliuns umans in fugia. Quai en uschè blers sco anc mai dapi la segunda guerra mundiala. L’agid umanitar stoppia era renconuscher en quest connex ses cunfins, e metter prioritads.

Collavuraziun tar conferenzas è impurtant

Tant pli impurtantas sajan perquai collavuraziuns internaziunals. La Svizra sa participescha quest onn a pliras grondas conferenzas internaziunalas da l'ONU per formular finamiras cuminaivlas.

DEZA vul investir dapli en pajais fragils

In focus spezial deditgescha la DEZA a pajais fragils. Quai vul dir, pajais che n’han naginas structuras statalas stablas pli pervi dals conflicts interns. Radund 40 pajais tutgan en questa categoria. En l’Afganistan u il Haiti per exempel manca vi da tut, e l'agid umanitar è savens l'unic sustegn che abitants da quests pajais tschiffan. La Svizra ha augmentà perquai ils ultims onns il sustegn per quests pajais fragils per 20%.

Furmaziun professiunala in ulteriur accent

Spezialmain quità fetscha la dischoccupaziun mundiala da giuvenils. Actualmain datti 75 milliuns giuvenils tranter 15 e 24 onns senza lavur, uschè blers sco anc mai. Gist pajais en svilup èn pertutgads fermamain, e las consequenzas d'ina tala dischoccupaziun sbuccan savens en frustraziun e violenza. La DEZA less perquai intensivar ses sforzs tar projects da furmaziun professiunala, tenor il model svizzer da giarsunadi.