Siglir tar il cuntegn
Inhalt

Svizra Desditga senza preavis è giustifitgada

In emploià da las Viafiers federalas aveva consumà pornografia en l’internet durant il temp da lavur. Il Tribunal federal ha uss confermà la desditga dal contract da lavur senza preavis.

Il Tribuna federal a Losanna.
Legenda: Il Tribuna federal a Losanna ha confermà ina desditga immediata. Keystone

Era suenter 22 onns lavur irreproschabla è ina desditga senza preavis giustifitgada pervi da visitas sin paginas da pornografia durant il temp da lavur. Quai ha decidì il Tribunal federal en il cas d'in anteriur emploià da las Viafiers federalas.

L'atun 2014 aveva la SBB relaschà l'um suenter ch'il servetsch d'informatica aveva constatà visitas intensivas da paginas d'internet cun pornografia. Durant 17 dis da lavur era l'emploià stà pli che 80 uras sin talas paginas. Tranter quellas eran era paginas d’internet cun cuntegn relevant al dretg penal.

Era sche las Viafiers federalas han fatg sbagls pertutgant la protecziun da datas, ha l’interpresa tuttina pudì sa referir sin ils resultats chattads per argumentar la desditga. Quai ha confermà il Tribunal federal. La relaziun da lavur cun l’impiegà saja stà pervia da ses surpassament talmain desastrusa, ch’ina desditga senza preavis saja stà l’unica via pussibla, concluda il tribunal.

RR novitads 12:00