Siglir tar il cuntegn

Header

Navigaziun

Umens en ina moschea.
Legenda: Surtut duai vegnir evità che quai dat radicalisaziuns en Svizra. Keystone
cuntegn

Svizra Deradicalisaziun in dals instruments per cumbatter il terror

La Svizra vul rinforzar ils instruments per cumbatter il terror. Ord vista da la Task Force da la Confederaziun duai surtut vegnir dà dapli paisa a la deradicalisaziun.

Uss duajan la Confederaziun, ils chantuns e las vischnancas proponer enfin la fin dal onn in plan d’acziun naziunal.

La tendenza da simplamain reagir cun dapli mesiras da segirezza è gronda, ha ditg la directura dal Uffizi federal da polizia Nicoletta della Valle la responsabla da la Task Force. Il mument na dettia quai però nagin recept da patenta co cumbatter il terrorissem motivà da radicals muslims. Per pudair chattar soluziuns ston ils responsabels avair dapli cumpetenzas perquai che dumandadas èn soluziuns interdisciplinaras.

La gronda periclitaziun èn attatgas simplas

Sco la Task Force scriva en ses rapport saja il pli grond privel per la Svizra attatgas simplas senza pli gronda logistica sco attatgas da persunas singulas ni gruppas pitschnas. Surtut persunas radicalisadas en Svizra vegnian en dumonda per talas attatgas, scriva la Task Force.

Co agir cun persunas che returnan ord da cumbats

Il mument manchian anc pussaivladads preventivas, uschia per exempel na dettia quai nagina pussaivladad da citar persunalmain persunas suspectadas sin il post da polizia, ni da prender davent il permiss dad ir cun auto. L’Uffizi federal da polizia è il mument londervi da elavurar talas mesiras era ordaifer las mesiras da l’inquisiziun penala.

Il mument èn registradas radund 81 persunas da la Svizra ch'èn stadas en pajais da conflict en «il Dschihad». 30 da quellas persunas han il pass svizzer.

RR novitads 10:00