L'onn 1989, chavorgia Schöllenen ad Uri: La gruppa «Iniziativa da las alps» preschenta lur idea. Els vulan proteger las alps. Per cuntanscher quai dess la Confederaziun reglar il transport da transit – la rauba che vegn transportada tras il pajais. Tut quai dess tenor els vegnir transportà cun il tren.
Cun ina conferenza da quel temp unica lantscha l'iniziativa da las alps sia iniziativa: Ina persuna travestgida da diavel, ils camiuns che la seguan. Cun blera simbolica emprovan els da chattar simpatia.
Il proxim onn ramassan els suttascripziuns. Surtut en ils chantuns da muntogna chattan els simpatisants. Cur ch'els han avunda suttascripziuns, inoltreschan els lur iniziativa – natiralmain era cun bler simbolica.
Dentant betg tuts èn uschè persvas da l'idea. Il Cussegl federal, il cussegl dals chantuns sco era il cussegl naziunal refusan l'iniziativa. En il comité cunter l'iniziativa è era il cusseglier naziunal dal Grischun Dumeni Columberg (PCD). Sco ch'el di il 1994 en ils «Accents», na saja l'iniziativa betg pli necessaria. Dapi che l'iniziativa è vegnida lantschada, saja la situaziun sa midada fermamain.
Di da decisiun
20.02.1994 – Stgars 52% dals votants e bunamain dus terzs dals chantuns mettan in «gea» en l'urna – l'iniziativa da las alps vegn acceptada. Ils iniziants han festivà lur success en l'Uri, nua che tut ha cumenzà 5 onns avant.
Uss sto la Confederaziun metter enturn las pretaisas da l'iniziativa da las alps. Fin il 2004 ston els spustar il traffic da transit da la via sin ils binaris. Daltut n'è quai dentant betg vegnì realisà.
Tenor l'Uffizi federal da traffic ASTRA va oz bunamain 70% dal transport da transit cun il tren. Vul dir: bunamain in terz va anc sin via. Tenor l'ASTRA è quai stgars in milliun camiuns.
Sco che Andreas Hämmerle, iniziant ed anteriur cusseglier naziunal, ha ditg envers il schurnal regiunal Grischun, na vesa el quai dentant betg sco perdita. Sche l'iniziativa na fiss betg stada, fissi tenor el anc bler dapli camiuns.
RR Actualitad 07:00