Decleraziun da taglia er senza suttascripziun

En l’avegnir na duai la decleraziun da taglia betg pli stuair vegnir suttascritta. Il Cussegl federal propona al parlament d’approvar ina moziun dal cusseglier dals chantuns dal Grischun Martin Schmid (PLD). Uschia possia la decleraziun da taglia vegnir inoltrada dal tuttafatg sin via electronica.

Dunna ch'emplenescha la decleraziun da taglia.

Legenda da maletgs: Senza suttascripziun pudess la decleraziun da taglia vegnir inoltrada dal tuttafatg a moda electronica. Keystone

En blers chantuns saja quai gia oz pussaivel, da far la decleraziun online e da trametter quella a moda electronica a l’administraziun da taglia, scriva Schmid en sia proposta. Adina pli savens possian er ils ulteriurs documents vegnir tramess sin via electronica.

Tscherts chantuns desistan gia da la suttascripziun

Pervia da las reglas vertentas stoppian ils paja-taglia però anc suttascriver in formular. Cunquai che la suttascripziun electronica na saja fin ussa betg sa cumprovada en la pratica, impedeschia quai il process simpel ed effizient, crititgescha Schimd. Tscherts chantuns hajan perquai decis da desister da la suttascripziun. Tant sco quai ch'ins saja, n'haja quai fin ussa betg chaschunà problems.

RR novitads 16:00