Siglir tar il cuntegn
Inhalt

Svizra Debloccada dals dossiers cun l’Uniun europeica

L’Uniun europeica negoziescha puspè cun la Svizra davart tut ils dossiers. Quai han la presidenta da la Confederaziun Doris Leuthard ed il president da la cumissiun europeica Jean-Claude Junker annunzià suenter in discurs a Brüssel.

Doris Leuthard e Jean-Claude Juncker.
Legenda: La presidenta da la Confederaziun Doris Leuthard preschenta ils resultats dals discurs cun l'UE. Daspera Jean-Claude Juncker. Keystone

Ils dossiers davart las relaziuns bilateralas tranter la Svizra a l’UE paran uss da chattar nov schlantsch. Uschia vegnian quai puspè manà en tut ils dossiers discurs tecnics ha ditg la cussegliera federala Doris Leuthard.

Las contractivas tranter l’UE e la Svizra eran vegnidas messas d’in maun suenter che la populaziun svizra aveva approvà l’iniziativa d’immigraziun da massa. Era suenter che la Svizra aveva signalisà da vulair realisar l’iniziativa d’immigraziun da massa senza vegnir en conflict cun la libra circulaziun da persunas n’aveva quai dà nagin moviment en chaussa.

Finamiras communablas

Fin la fin da l’onn duai ina cunvegna da basa tranter la Svizra e l’UE esser sin maisa era sche quai dettia il mument anc pliras dumondas avertas. Surtut sajan quai dumondas tar l’accumodament da cuntraversas ma ils subsidis dal stadi public sajan puncts da discussiun, conferma Leuthard. Ma els n’hajan nagin squitsch da temp. Impurtant saja la qualitad da la cunvegna, ha ditg la presidenta da la Confederaziun.

La stad va Leuthard a Brüssel

La proxima stad vegn alura la presidenta da la Confederaziun Leuthard a far ina proxima visita da lavur a Brüssel. Juncker da sia vart ha annunzià da vulair vegnir l’atun sin visita da lavur en Svizra.

RR novitads 14:00