Siglir tar il cuntegn
cuntegn

Svizra Daventar donatur d'organs cun dir nagut

Mintgina e mintgin duai esser donaturA dad organs, sch’ins na di betg explicitamain na. Quai pretenda l’iniziativa «promover la donaziun d’organs – salvar vita» ch'è vegnida lantschada oz a Berna.

Legenda: Tadlar il audio Donaziuns d'organs: iniziativa lantschada. Durada 02:11 minutas.
02:11 min, Actualitad dals 17.10.2017.

En Svizra pon vegnir duvrads ils organs da las persunas che dattan explicitamain lur consentiment. L’iniziativa vul il cuntrari. Sch’ins na di nagu,t èn ins automaticamain donatur. En in register naziunal duai tut vegnir notà. Per adversaris da l'iniziativa è quai in problem etic.

L’iniziativa vul promover la donaziun dad organs ed è vegnida lantschada da l’organisaziun Jaune Chambre Internaziunal Riviera. Sustegnida vegn l’iniziativa era da Swisstransplant.

85% da las Svizras ed ils Svizzers sajan pronts da dar lur organs, ma il problem saja tenor il directur da Swisstransplant, Franz Immer, ch'i na vegnia betg discurrì en famiglias e tranter amis da dar ils organs en cas da mort. Uschia resta, per exempel tar in accident, la decisiun per il pli tar la famiglia che na sa betg, sch'ella duai dar liber ils organs u betg. En ina tala situaziun sa decidan 60% da betg dar ils organs.

Engular organs

Ils adversaris èn dentant persvas che l'iniziativa na saja eticamain nagina soluziun. I na possia betg esser, ch'ins prenda simplamain ils organs, sch'ins na di nagut. Dentant di Franz Immer haja la famiglia adina l’ultim pled. Sche quella sa che la persuna na saja betg pronta da dar ils organs, pon els intervegnir.

Ina persuna po salvar otg autras

Mintg’emna moran 2-3 persunas, perquai ch'i na dat betg avunda organs. Per il mument spetgan 1'500 persunas sin in organ. Cun in donatur pon ins salvar fin ad otg persunas.

En auters pajais sco la Frantscha, l’Austria u l’Italia datti in tal register. Là saja la cifra da donaturs pli auta che en Svizra. En Svizra datti 14.2 donaturs sin 1 milliun persunas. En ils auters pajais saja la cifra per il dubel uschè auta.

Plan da la Confederaziun n'haja purtà nagut

Il parlament aveva gia debattà dad ina tala opziun. Dentant ditg na, tranter auter causa che la Confederaziun aveva in plan d’acziun per la donaziun dad organs. Ma quel n'haja tenor ils iniziants betg pudì cuntanscher la populaziun.

Ina finamira da l’iniziativa saja da lantschar ina discussiun e da sensibilisar Svizras e Svizzers per il tema da las donaziuns d’organs. Uschia possian ins respectar ils giavischs da mintga singula persuna din ils iniziants.

RR actualitad 11:00