Pli ch’ils messadis populistics , fatgs alternativs e Fake News sa derasan e pli impurtanta che la statistica publica daventa per il discurs democratic. Davart quest tema ha oz discutà ina conferenza internaziunala a Berna.
Tenor Georges-Simon Ulrich, il directur da l’uffizi federal da statistica, èsi gist en sistems democratics sco la Svizra impurtant ch’ins possia distinguer tranter la vardad e la manzegna. Mintgin saja dentant responsabels d’agir cun saun giudizi sch’el legia ni auda in’infurmaziun u in messadi che na para betg dad esser dal tut credibel.
Sensibilisar populaziun
Per sensibilisar la populaziun giogan uffizis e las instituziuns publicas da statistica ina rolla impurtanta.
Cunzunt perquai ch’i dettia adina dapli organisaziuns ed interpresas che derasian lur cifras e statisticas da las qualas i na saja betg adina cler sin tge ch’ellas sa basian u da tge qualitad ch’ellas sajan. Instituziuns publicas sco l’uffizi federal da statistica stoppian perquai agir pli proactiv e dialogar cun la populaziun. La populaziun stoppia emprender ad analisar a moda critica las infurmaziuns e datas davos in messadi.
RR actualitad 06:00