Siglir tar il cuntegn
cuntegn

Svizra Dapli svieuta en la branscha da farmazia

La fiera da medicaments en Svizra è er il 2017 creschida. Totalmain han ins vendì medicaments en ina valita da 5,8 milliardas francs.

Medicaments.
Legenda: Il 2017 è er il dumber da medicaments che vegnan surpigliads da las cassas da malsauns creschids. Keystone

La svieuta da la fiera da medicaments en Svizra è s'augmentada per 4,2%. Quest plus possian ins cunzunt engraziar ad medicaments innovativs cunter cancer e malsognas autoimmunas.

En cumparegliaziun cun ils onns avant è il creschament dentant pli pitschen. Uschia è la fiera il 2015 creschida per 5,1% ed il 2016 per 4,7%.

Reducziuns da pretsch ordinadas

Sco che las uniuns rapportan avevan il 2015 ed il 2016 betg gì lieu controllas da pretsch pervia d'ina midada dal reglament. L'onn 2017 en puspè vegnidas fatgas controllas da pretsch ed ins ha ordinà ina reducziun dal pretsch tar 350 medicaments. Quai n'ha dentant nagin connex cun la svieuta en l'onn 2017 cunquai ch'ils pretschs èn pir vegnids sbassads entschatta 2018.

Dapli medicaments che vegnan surpigliads

Er il dumber da medicaments che vegn surpiglià da las cassas da malsauns è creschì per 4,6%. Cun 48,9% da quests medicaments èn ils pli blers medicaments che vegnan surpigliads da la cassa da malsaun vegnids cumprads en apotecas.

RR novitads 17:00