Siglir tar il cuntegn
Inhalt

Svizra Dapli protecziun per dischoccupads sur 55

La Conferenza svizra da l’agid social pretenda che persunas en la vegliadetgna da sur 55 onns, che perdan lur plazza da lavur, restan segirads tar l'assicuranza cunter la dischoccupaziun. Cun quai duai vegnir evità che las persunas pertutgadas stoppian ir per agid social.

In bul cun l'inscripziun "arbeitslos".
Legenda: Per persunas sur 55 saja fitg grev da chattar ina nova plazza da lavur, scriva la Conferenza svizra da l'agid social. Keystone

Per persunas sur 55 saja ina gronda sfida da chattar ina plazza da lavur, scriva la Conferenza svizra da l'agid social. Las persunas pertutgadas restian per il pli per in lung temp senza lavur. En ils blers cas vegnian duvrads si tut ils daners da l'assicuranza cunter la dischoccupaziun. La consequenza saja che las persunas hajan da retrair agid social.

La Conferenza svizra da l’agid social ha oz preschentà lur idea per las persunas senza lavur sur 55. Quellas duessan en l'avegnir survegnir fin tar la pensiun daners da la cassa da dischoccupaziun ed uschia betg pli avair da basegn dad agid social. Quai duai valair per persunas che han lavurà almain 20 onns e che han pers la plazza da lavur en la vegliadetgna da sur 55 onns.

RR novitads 12:00