Siglir tar il cuntegn

Svizra Dapli persunas han fatg suicidi cun agid dad Exit

L'onn passà han dapli persunas en Svizra fatg diever da l'organisaziun ch'assista al suicidi. Quai cun 734 persunas. Il 2016 avevan anc 723 fatg fin a la vita cun agid dad Exit.

Purtret dal medicament che vegn duvrà per far suizidi.
Legenda: Cun agid dad Exit han quest onn puspè pli bleras persunas prendì la vita. Keystone

Sco quai che l'uniun communitgescha, creschia er il dumber da commembers. Entant dumbria «Exit» passa 110'391 commembers. 10'078 dapli che l'onn 2016. Raschuns per quest augment saja surtut il fatg che la societad vegn adina pli veglia. En media èn las persunas che fan diever da l'assistenza al suicidi 78,1 onns. L'onn avant era quai anc 76,7 onns.

Il pli savens è cancer en il stadi final stà la diagnosa per vulair far fin cun la vita. Gist sco proxim èn quai stadas malsognas che vegnan cun la vegliadetgna e dolurs cronicas. Ils pli blers pazients che han fatg diever dad Exit èn stads en il chantun Turitg, sco segund èn quai stads ils chantuns Berna, Argovia, Son Gagl sco era Basilea-Citad e Basilea-Champagna.

Tut en tut restia l'accumpagnament al suicidi tenor Exit dentant scart. El pertutga radund 1,5% da las radund 66'000 morts ad onn en Svizra.

RR novitads 09:00