Siglir tar il cuntegn
cuntegn

Svizra Dapli persunas cun lavur pajada

En Svizra han il mument tantas persunas sco anc mai in'occupaziun per gudogn. Il terz quartal lavuravan passa tschintg milliuns persunas, in plus da 2% cumpareglià cun l'onn avant. Quai resulta da las novas cifras da l'Uffizi federal da statistica.

In lavurer en il tunnel da basa dal Ceneri tranter Bellinzona e Lugano (TI).
Legenda: In lavurer en il tunnel da basa dal Ceneri tranter Bellinzona e Lugano (TI). Keystone

5,051 milliuns occupads per gudogn deva quai en Svizra il terz quartal 2016. Il dumber d’umens cun lavur per gudogn è s’augmentà per 2,1%, quel da las dunnas per 1,9%.

La quota da las persunas senza ina lavur per gudogn muntava en Svizra il terz quartal a 4,8%. En l’Uniun europeica è la quota da persunas senza lavur per gudogn en il medem temp ida enavos da 8,9% sin 8,2%.

Dapli giuvenils senza lavur pajada

Tranter il terz quartal 2015 e 2016 è il dumber da forzas da lavur da l’exteriur creschì pli fitg che quel dals Svizzers. Il pli grond augment hai dà tar ils cunfinaris, suandà dals occupads per gudogn cun permissiun da domicil C, ed a la fin cun permissiun B.

Durant l’ultim onn è la quota da giuvenils (15 fin 24 onns) senza lavur cun gudogn creschida, numnadamain da 10,6% sin 11%. Aifer l’Uniun europeica è questa quota ida enavos durant il medem temp, da 19,9% sin 18%.

RR novitads 12:00

Occupaziun/lavur per gudogn?

Questa quota è per regla in zic pli auta che la quota da dischoccupaziun. La raschun è che quella resguarda er persunas che n'èn betg annunziadas tar l'uffizi per intermediaziun da lavur.