L’onn passà avevan ils collavuraturs survegnì in augment da paja da tranter 0,3% e 0,5% tar la Migros e da 0,5% tar il Coop.
Ils collavuraturs da Coop survegnan ultra da quai in nov contract da lavur. Communabel cun ils sindicats Syna, Unia e la Societad svizra d'emploiads da commerzi ha Coop communitgà ch'il contract per ils 37'000 collavuraturs vala per 4 onns. Bun in terz dals collavuraturs èn umens.
Tranter auter vegn il congedi per babs che valeva fin quai ina emna prolungà sin trais emnas. Era las dunnas survegnan a partir dal terz onn d’engaschi en tut duas emnas dapli ed en tut 16 emnas congedi da maternitad. Era tar la planisaziun dal temp da lavur ed en cas d’uffants malsauns duai dar megliuraziuns, communitgescha Coop.
Cun il congedi da paternitad suonda Coop ad autras fatschentas sco per exempel Migros, Ikea ni l'Axa-Winterthur che han gia fixà congedis da trais tochen quatter emnas.
Cussegl federal è cunter il congedi da paternitad
Sco Adrian Wüthrich, president da Travail Suisse di envers SRF, porschian cunzunt fatschentas grondas in bun congedi da paternitad. Fatschentas mesaunas e pitschnas dentant, hajan savens buc la pussaivladad da far quai.
Wüthrich è iniziant da l'iniziativa che pretenda in congedi da paternitad da 20 dis. Il Cussegl federal ha però refusà l'iniziativa.
RR novitads 14:00