Dapli insolvenzas en il Grischun, damain en Svizra

Quai demussan las novas cifras dal servetsch d’infurmaziuns economicas «Bisnode» per il mais da schaner.

Buls da l'uffizi da scussiun.

Legenda da maletgs: Il schaner èn ils buls da l'uffizi da scussiun vegnids duvrads pli pauc en Svizra. Keystone

En il Grischun han in zic dapli firmas declerà insolvenza il schaner 2016. Cumpareglià cun il medem temp da l'onn passà è il dumber creschì minimal da 6 sin 7. Quai demussan las novas cifras dal servetsch d’infurmaziuns economicas «Bisnode».

Damain insolvenzas en Svizra

En l'entira Svizra è il dumber da las insolvenzas però sa reducì il medem temp per 4% sin 351. Tenor «Bisnode» è cunzunt il dumber d'insolvenzas creschì tar las interpresas da cussegliaziun, holdings e societads d'investiziun. Las pli bleras insolvenzas hajan dentant declerà interpresas artisanalas e da construcziun.

Inscripziuns en il register da commerzi

Sa reducidas èn però er las fundaziuns da firmas novas. Cumpareglià cun il schaner da l'onn passà èn vegnids registrads 2% damain firmas cun 3’150. Da quellas èn 78 vegnidas fundadas en il Grischun. Quai è in plus da 30% cumpareglià cun l’onn avant. Lura eran anc 60 firmas novas vegnidas registradas en il chantun.

RR novitads 10:00