Siglir tar il cuntegn

Svizra Dapli iniziativas lantschadas

En Svizra han organisaziuns e persunas lantschà quest onn 10 ed inoltrà 5 iniziativas dal pievel. Quai tenor ina statistica da l'agentura da novitads SDA. Quai dumber è in zic pli aut ch'ils ultims onns. Vegnì votà n'èsi dentant davart naginas iniziativas.

Purtret cun stgatlas plainas cun en suttascripziuns per in'iniziativa.
Legenda: Stgatlas plainas cun suttascripziuns per in'iniziativa inoltrada. Keystone

Tar questas tschintg iniziativas inoltradas tutgan era l'iniziativa da burca e l'iniziativa che vul quatter emnas congedi da paternitad. Ellas han era cuntanschì las 100'000 suttascripziuns necessarias. Idas da la glatscha giu pervi da mancanza da suttascripziun èn dentant l'iniziativa «Stopp als excess da Via Sicura» e «Gie a la medischina da moviment». Dasper quai èn anc trais iniziativas vegnidas retratgas. Tranter auter l'iniziativa da Rasa.

Onns da paucas iniziativas

Ils ultims onns hai dà plitost paucas iniziativas. Il record è stà il 2011, cun 23 iniziativas lantschadas. Ils onns suenter èsi stà en media anc 13. Malgrà quai ch'i è vegnì inoltrà pli paucas, èn il mument anc adina 14 iniziativas pendentas tar il Cussegl federal u il parlament.

Pronta per ir en votaziun è sulet la «No Billag», l'iniziativa che vul abolir las taxas da radio e televisiun. Davart quella vegn votà ils 4 da mars 2018.

RR novitads 16:00