Siglir tar il cuntegn
Inhalt

Svizra Dapli incaps en l’aviatica svizra

Il dumber d'incaps e bunamain collisiuns en l'aviatica svizra è creschì marcantamain. Quai rapporta la SonntagsZeitung, sa referind a l'Uffizi per examinaziun d'accidents e segirtad da la Svizra.

Strivlas da condensaziun.
Legenda: I dat adina dapli situaziuns privlusas tranter aviuns vi dal tschiel. Keystone

L'onn 2016 ha il SUST Uffizi per examinaziun d'accidents e segirtad da la Svizra registrà passa 80 accidents u grevs incaps. Sco per exempel aviuns che sajan bunamain collidads l'in cun l'auter. E quai tants sco dapi 20 onns betg pli, uschia il post.

Bunamain collisiuns

S'augmentà marcant han las «bunamain collisiuns». Dapi il 2015 èn quels creschids da 4 sin 16, quai è quatter giadas dapli. En 9 cas eran involvids aviuns gronds. S'augmentà èn era incaps tranter aviuns pli pitschens e quai da 3 sin 7. Ina da las raschuns per quest augment sajan ils differents sistems d'alarm d'aviuns pitschens che na sajan betg cumpatibels l'in cun l'auter.

Jumbolino da la Swiss.
Legenda: Ils 15 d'avust 2017 sgola l'aviun Avro RJ 100 da la Swiss per la davosa giada. Keystone

Jumbolino

In tip d'aviun croda en egl, e quai è il Jumbolino da la Swiss. Problems pli gronds datti tar il charret d'atterrar, aletta d'atterrar e controlla da guvernagl. L'onn 2016 hai dà 15 avis, otg da quels l'october passà. Perquai prenda la Swiss il jet per sgols a curta distanza en in'emna or da la circulaziun.

Aspects positivs

I dat dentant era aspects positivs. La cifra dad accidents è sa sminuida, vul dir eveniments tar quals persunas u aviuns han purtà donns. La cifra era il 2016 cun 37 cas uschè bassa sco il 2010 betg pli.

RR novitads 07:00