Siglir tar il cuntegn
cuntegn

Svizra Dapli gudogn per UBS

La banca UBS ha pudì augmentar il terz quartal ses gudogn per 14% sin 900 milliuns francs. Il gudogn è d'attribuir a 2,4 milliardas francs dapli daners novs.

La banca UBS ha era en il terz quartal dal onn nudà in gudogn.
Legenda: La banca UBS ha era en il terz quartal dal onn nudà in gudogn. Keystone

Sco quai che la banca gronda communitgescha hajan tranter auter las reservas grondas per taglias che l'UBS spetga en ils Stadis Unids restrenschì il gudogn. Era ha la banca gronda fatg respargns da radund 100 milliuns francs. Uschia possia la finamira da respargns da 2,1 milliardas francs fin la fin dal onn vegnir cuntanschida, scriva l’UBS.

Dapli persunal

La banca gronda ha malgrà ch’ella ha fatg gronds respargns engaschà dapli persunal. Uschia ha ella engaschà da nov en il terz quartal da l’onn 1’326 persunas sin uss 60’796 emploiadas ed emploiads. Plirs servetschs da terzas persunas vegnia ella far vinavant sezza, argumentescha l’UBS.

Gudogn plascha als investiders

Il gudogn da l'UBS ha era plaschì als investiders a la bursa. La valur da l'aczia da l'UBS è s'augmentada durant l'emprim ura suenter la communicaziun per 2% sin 17,6 francs. Quai è quest onn il pli aut pretsch per in'aczia da l'UBS.

RR novitads 09:00