Siglir tar il cuntegn
Inhalt

Svizra Dapli gudogn – grazia a vendita d’aczias da PostFinance

Malgrà che la Posta svizra ha da sbatter cun pli paucas brevs, ha ella pudì augmentar marcantamain il gudogn ils emprims nov mais da l'onn. Il motiv èn effects singulars sco la vendita d’in pachet d’aczias da la PostFinance.

Logo da la Posta svizra
Legenda: La Posta svizra po augmentar ils emprims nov mais dal onn il gudogn per 50 milliuns francs. Keystone

Uschia haja la Posta dal schaner fin il settember gudagnà 516 milliuns francs, 50 milliuns dapli che durant la medema perioda da l'onn passà. Il gudogn d’interpresa è cun 699 milliuns francs radund 106 milliuns sur quel da l’onn passà. Dentant è l’entira svieuta da l’interpresa sa reducida per 1,2% sin quasi 6 milliardas francs.

Surtut la PostFinance ha contribuì al gudogn

Il resultat positiv è surtut d’attribuir a la PostFinance. Lezza ha ils emprims nov mais da l'onn fatg in gudogn da 533 milliuns francs, in augment da 123 milliuns francs. La PostFinance haja tuttina da sbatter cun il dischavantatg en las fatschentas da credit ed ipotecas, scriva la Posta. La banca da la posta ha ina licenza da banca, ma ella na dastga betg dar credits ed ipotecas.Quai per pudair minimar ils ristgs per ils pajataglias.

Fatschenta da coc sut squitsch – sco gia daditg

Era il squitsch sin la fatschenta principala da la Posta resta. Danovamain è il quantum da brevs distribuidas sa sminuì ed er las frequenzas als spurtegls sa reduceschia, scriva la Posta. Uschia resultia in minus da 130 milliuns francs en questa sparta.

Il martgà da pachets e la blera concurrenza

Ils emprims nov mais da l’onn ha la Posta pudì augmentar per 6,3% il quantum da pachets. Grazia al grond quantum da pachets en Svizra e tschertas cumpras noda quest sectur in resultat da gestiun da 84 milliuns francs, ed in plus da 11 milliuns francs. Las marschas en la fatschenta cun pachets resta dentant anc vinavant sut squitsch tenor la Posta. Adina dapli distributurs da l’exteriur e concurrents per purschidas digitalas vegnian sin il martgà svizzer.

RR novitads 14:00