Siglir tar il cuntegn

Header

cuntegn

Svizra Dapli glisch – l'iniziativa per transparenza politica è inoltrada

L’iniziativa vul far transparent danunder ch'ils raps en la politica vegnan. Las partidas ed ils comités duain metter lur budget sin maisa. Plinavant pretenda l'iniziativa, ch'er donaziuns da firmas, dad organisaziuns u persunas per partidas u campagnas sur 10'000 duain vegnir decleradas.

Passa 110'000 persunas sustegnan cun lur suttascripziun la pretensiun per dapli transparenza en la politica. Purtada vegn l'iniziativa da transparenza tranter auter da la Partida socialdemocratica, dals Verds e da la Partida burgais-democratica, ma er da partidas pli pitschnas e da pliras organisaziuns.

audio
Mezdi: Iniziativa da transparenza è inoltrada
ord Actualitad dals 10.10.2017.
laschar ir. Durada: 2 minutas 19 Secundas.

Arguments pro e contra dapli transparenza

Per ina democrazia che duai funcziunar duain las finanzas e cun quai ils interess esser transparents argumenteschan ils iniziants. Adversaris da l’iniziativa teman dentant ch’ins pudess perder donaturs e cun quai raps, sche quels vegnissan publitgads.

Suenter vi e nà en il parlament duai decider uss il suveran

En il parlament è gia diversas giadas vegnì discutà davart la transparenza da la finanziaziun da partidas. Dentant n'ha il parlament betg sustegnì quellas ideas. Uss decida il suveran svizzer. A l'urna vegn l’iniziativa il pli baud il 2019.

Finanziaziun da partidas en critica er tar Cussegl d'Europa

Crititgada vegn la finanziaziun da las partidas betg transparenta en Svizra er da la GRECO. Quai è il gremi dal Cussegl d'Europa che s’occupa cun corrupziun. La critica vegn plitost perquai che bleras campagnas da votaziuns ed elecziuns n'èn betg transparentas finanzialmain.

La GRECO pretenda numnadamain, che sche la finanziaziun da las campagnas va sur in tschert cunfin definì, stoppia ella esser transparenta. Quai vul ella per evitar, ch'i dat corrupziun e ch'il pievel vegn manipulà dad ina ni da l’autra campagna.

RR actualitad 12:10

Artitgels legids il pli savens