Siglir tar il cuntegn
cuntegn

Svizra Dapli fidanza en radios ch'en televisiun

Ina retschertga represchentativa dal Bakom ha mussà che la populaziun preferescha purschidas da l'SRG avant quellas d'emetturs privats. Plinavant survign il radio meglieras notas che la televisiun.

Purtret da quatter microfons cun mintgin si il logo da l'SRG
Legenda: Dals radios da l'SRG sa fida la glieud fitg. Keystone

Tenor l'Uffizi federal da communicaziun preferescha la populaziun Svizra ils radios avant la televisiun. La purschida da l'SRG vegn preferida avant quella dals radios privats. En la retschertga han ils emetturs da l'SRG survegnì las meglieras valitas. Las emissiuns da televisiun da l'SRG èn tuttina bain preferidas sco ils emetturs da radios privats. Davos lez èn ils emtturs da televisiun privats. Per il studi èn 3'689 persunas da sur 15 onns vegnidas dumandadas.

Ils emetturs da radio da l'SRG han survegnì bunas notas en las categorias «professiunalitad», «credibladad» e «cuntegn d'infurmaziun». Ils emetturs da televisiun da l'SRG han gì las medemas fermezzas, ma betg uschè ferm sco ils radios.

Er il sa cuntegnair online è vegnì intercurrì

91% da las persunas dumandadas dovran l'internet. Bunamain tut questas persunas s'infurmeschan cun medias classicas sco televisiun, radio e pressa. Ils users Svizzers èn tenor la retschertga trais quarts dal temp ch'els èn sin l'internet sin paginas internaziunalas. Google è qua la plattafurma ch'els passentan il pli bler temp cun 97 minutas ad emna.

Suenter Googel suondan Whatsapp e Facebook cun 63 minutas respectiv 51 minutas e Youtube cun 30 minutas per emna. Sin il tschintgavel plaz è lura 20min.ch sco emprima pagina da novitads cun 26 minutas ad emna.

La pagina d'internet da l'SRG, srf.ch vegn sin 21 minutas per emna e pir suenter ina pulita pausa lura Blick.ch cun 8,9 minutas, nzz.ch cun 6 minutas e Tagesanzeiger.ch cun 5,6 minutas.

RR novitads 18:00