Betg dapertut en Svizra custa la vita da mintgadi tuttina bler. Quai mussa l’uschenumnà indicatur RDI da la Credit Suisse. L’analisa da l’attractivitad d’abitar da vischnancas e chantuns en Svizra è l’emprima giada vegnida fatga avant 10 onns.
La banca gronda ha resguardà tut ils custs relativs al domicil, sco per exempel taglias, custs da pendular, premias da cassas da malsauns ed auters custs fixs.
Survista da l’analisa
- Il tegnairchasa ordinari viva il pli bunmartgà en ils chantuns Uri e Glaruna (bass custs d’abitar, custs da taglia moderads).
- Chantuns rurals èn en general finanzialmain pli attractivs (Sursilvania, Turgovia, Appenzell Dadens).
- Il pli char èsi da viver en ils chantuns Genevra e Basilea-Citad (auts custs d’abitar, custs da taglia e da cassas da malsauns surproporziunals),
- Cun ina midada dal lieu d’abitar pon intgins tegnairchasa optimar lur budget.
- Persunas che gudognan pauc pajan per abitar savens dapli che 30% da lur entradas.
Bass custs fixs enturn il Gottard
En tut mussa la calculaziun ch’igl è pli bunmartgà da viver en champagna ch’en citads. Ordvart char èsi da viver a Turitg, Basilea, Genevra ed en intgins lieus turistics sco San Murezzan, Gstaad u Zermatt. Percunter han abitantas ed abitants da vischnancas enturn il Gottard en relaziun custs fixs pli bass.
Tar ils chantuns è l’Uri ord vista finanziala, sco gia tar l’ultima calculaziun dal 2011, il chantun il pli attractiv per viver. Lunsch davent da quai a la fin da la glista sa chattan ils chantuns cun gronds centers Genevra e Basilea-Citad.
Deducziuns per custs d'assistenza – grondas differenzas
Tut tenor veglia politica e pussaivladads finanzialas lubeschan ils chantuns a famiglias da trair giu ils custs per l'assistenz’estra da la taglia sin las entradas.
Cun passa 19’000 francs lubescha il chantun Neuschatel deducziuns maximalas lunsch sur quellas d’auters chantuns. En l’Uri pon vegnir fatg valaivels tut ils custs. En auters chantuns tanschan las deducziuns da 3’000 francs (Vallais) fin 10’000 francs (Sursilvania, Glaruna, Basilea-Citad, Appenzell Dador, Grischun, Argovia, Turitg).
Tut tenor furma da l'assistenza e tariffa dependenta d’entradas èn las deducziuns pia pli bassas ch’ils custs effectivs ch’ils tegnairchasa ston purtar.
RR novitads 11:00