Siglir tar il cuntegn
cuntegn

Svizra Dapli dunnas duain far militar

L'armada svizra vul carmalar dapli dunnas. Dunnas giuvnas duain vegnir obligadas da visitar in di d'infurmaziun. Avair cleramain dapli dunnas en l'armada fiss giavischaivel ha ditg il cumandant da corp Daniel Baumgartner en in'intervista cun la «Neue Zürcher Zeitung».

quatter dunnas en mondura militara sesan ina sper l'autra
Legenda: Las dunnas giuvnas duain gidar da cumplettar il dumber da schuldads en l'armada svizra. Keystone
Dunnas patratgan ed ageschan auter ch'umens e quai faschess bain a l'armada.
Autur: Daniel BaumgartnerCumandant armada

L'armada svizra cumbatta in problem da recrutaziun, quai ha ditg il nov schef da l'armada Philippe Rebord a chaschun da sia elecziun il settember passà. Ils motivs èn multifars: Numerus recruts rumpan giu la recruta, blers gnanc vegnan a la recruta e radund 3'000 umens giuvens sa decidian gia baud da far servetsch civil enstgal dal servetsch militar.

Per motivs da sanadad vegnan zavrads ozendi 3'000 recruts durant la recruta. 500 giajan en il servetsch civil, ha ditg Baumgartner. Entant ch'il «problem» servetsch civil è ina chaussa politica, saja ses pensum da pudair reducir las partenzas da l'armada «sin in nivel normal». Las pretensiuns da l'armada surdumandan blers. Qua stoppian els prender dapli resguard.

Concretamain patratga Baumgartner vidlonder da levgiar il cumenzament da la recruta. Recruts duain pudair sa restabilir meglier.

Nossa societad n'è simplamain betg pli disada cun in manaschi da servetsch da las 6:00 fin las 23:00
Autur: Daniel BaumgartnerCumandant armada

Er tar la fitness veglia el agir. Avant che recruts èn suttamess a grondas chargias corporalas, stoppia lur musculatura vegnir rinforzada, uschia Baumgartner.

RR novitads 06:00