Sco quai ch’il Secretariat da stadi per la migraziun communitgescha, sajan vegnidas inoltradas radund 1’900 dumondas. Quai correspunda ad in plus da 8% cumpareglià cun il mais d’avrigl. Quest augment haja da far cun la stagiun – la stad arrivan numnadamain dapli migrants en l'Italia dal Sid.
Vegnan questas cifras cumparegliadas cun il matg da l'onn passà è il dumber dentant sa reducì. Lura avevan passa 2’200 persunas dumandà asil en Svizra. Ils blers fugitivs derivan actualmain da l’Eritrea, la Somalia e l’Afghanistan.
Tenor cusseglier federal Ueli Maurer vegnan fugitivs da nov er sur las valladas dal sid grischunas en Svizra. Er en il Tessin registreschian ins il mument ordvart blers fugitivs.
RR novitads 18:00