Siglir tar il cuntegn

Svizra Dapli cas da hepatitis A en Svizra

En Svizra èn ils cas da Hepatitis A creschids marcantamain l'onn passà. Cumpareglià cun il 2016 èn passa dubel e mez uschè bleras persunas s'infectadas cun la malsogna. La gronda part n'era betg vaccinada.

ina squitta anc pachetada
Legenda: Ina squitta per cumbatter hepatitis A. Keystone

Tut en tut sajan vegnids annunziads 110 cas communitgescha l'Uffizi federal da sanadad. Il 2016 eran quai anc 43.

Pertutgads il pli savens èn umens giuvens tranter 20 e 30 onns. En tut èn trais giadas dapli umens che dunnas s'infectads l'onn passà. Ils onns avant era la relaziun tranter las schlattainas quasi eguala. La malsogna che chaschuna ina inflammaziun dal dir è cunquai creschida sin il pli aut nivel dapi il 2009, lura era quai 107 cas.

Hepatitis A

Quai è ina inflammaziun acuta dal dir. Il virus vegn secretà cun il passacorp da persunas infectadas e transferì u entras contact direct da persuna a persuna u a moda indirecta entras mangiar victualias contaminadas u baiver aua tschuffragnada.

L'infecziun succeda per gronda part en l'exteriur, il pli savens en la Spagna, la Frantscha e l'Italia.

RR novitads 16:00