Da far han ins avunda e la tendenza giaja en direcziun adina dapli. Ils cas da cuntrabanda, ni dad armas u da persunas che vegnan illegalmain en svizra creschia onn per onn di Mario Fässler, il maior da la regiun da guardia da cunfin 3 che includa il Grischun. Era il Grischun e pertutgà, dentant main che autras regiuns.
2.1 milliuns persunas, 1.1 milliuns autos ed 24’000 camiuns passan mintga di sur ils cunfins svizzers. Per controllar stattan a disposiziun var 2'000 guardias da cunfin declera Mario Fässler.
Sche nus giavischain dapli guardias da cunfin u betg è irrelevant. La politica sto far la discussiun. Nus essan profis e lavurain cun quai che nus survegnin.
La politica stoppia far las discussiuns e decider sch'i vul dapli guardias u betg. Ed il schef dal departament da polizia beneventass dapli guardias da cunfin. Sch'i dat dapli armas, dapli cuntrabanda e dapli migraziun less quai era dapli guardias da cunfin.
Nus avain vis en ils ultims onns che la situaziun als cunfins po sa midar svelt e ch’ins sto esser preparà. Perquai ans engaschain nus per dapli guardias da cunfin en nossa regiun sco era en tut la Svizra.
Dentant fetschian ils da la guardia da cunfin ina lavur excellenta en collavuraziun cun la polizia chantunala, intuna il cusseglier guvernativ.
Era il cussegl grond dal Grischun è s'exprimì per pli bleras guardias als cunfins Grischuns. Cun in'iniziativa dals chantuns han els fatg attent il cussegl federal. Quel na vul betg auzar il dumber, cun quai che la Confederaziun duai spargnar. En la sessiun d’enviern decida il parlament davart il budget ed uschia era davart il dumber da las guardias da cunfin.
Avant curt aveva la cumissiun da segirezza dal cussegl naziunal decis ch'il corp da la guardia da cunfin duai survegnir 30 plazzas dapli. In motiv è quel, ch'i detta adina dapli violenza e smanatschas envers las guardias da cunfin en il Tessin ed a Genevra. En il grischun na saja quai uschia. La situaziun è stabila era sch'i dat daplirs cas che cuntrafan la lescha, violenza na datti betg dapli.
RR actualitad 17:00