En il chantun Berna è danovamain vegnì observà in urs, bun in mais suenter ch’in um aveva observà in urs en la regiun da Thun è in animal vegnì observà en il territori dal Sustenhorn. Sco la direcziun da l’economia publica dal chantun Berna scriva, han alpinists era pudì observar tranter ils 28 ed ils 30 da zercladur in urs sin territori da la vischnanca da Innerkirchen. Era sin il cunfin cun l’Uri èn vegnids observads fastizs d’in urs, conferman las autoritads.
Sche quai è il medem urs sco quel ch’è vegni observà avant in mais, n’è betg enconuschent. I n'è er betg cler sche quest urs è anc adina en la regiun. La direcziun da l'economia publica dal chantun Berna supplitgescha d'annunziar al guardiaselvaschina sch'ins vesa l'urs. Els appelleschan dentant er da tegnair distanza da l'animal. I sa tractia la finala d'in animal da rapina.
L'urs ch'è vegnì observà avant in mais aveva procurà per gronda fascinaziun. Igl è la finala stà l'emprima giada dapi 190 onns ch'ins ha puspè vesì in urs en il chantun cun in urs en la vopna. Là è vegnì speculà, ch'i sa tractia forsa d'in urs ch'è ì davent dal Grischun sur il chantun Uri e sur questa via a Berna.
RR novitads 16:00