Siglir tar il cuntegn

Svizra Daners bluts èn en moda

Bunamain mintgin posseda ozendi ina carta da credit. Appreziada na para ella dentant betg dad esser, en spezial betg tar la giuventetgna. Per cumpras da mintgadi prefereschan ils consuments e las consumentas daners bluts. Quai demussa ina retschertga da comparis.ch.

in maun che tegn duas bancnotas ed ina carta da credit
Legenda: Daners bluts u carta da credit? La giuventetgna preferescha ils daners bluts. Keystone

Mo 14% da las persunas svizras sut 30 onns prefereschan la carta da credit per pajar. Tar tschellas gruppas da vegliadetgna èsi 30%.

En la Svizra tudestga ed il Tessin paja la clientella pli gugent cun daners bluts, en la Svizra franzosa preferescha la clientella la carta da credit. Pli aut che la summa è e pli savens vegn duvrà la carta da credit.

En tut crescha il dumber da cartas da credit. Oz hai passa 6 milliuns da quellas en Svizra. Avant 5 onns eri anc in milliun pli pauc.

RR novitads 12:00