Siglir tar il cuntegn
cuntegn

Svizra Damain zutger en jogurts e müeslis

Jogurts, cerealias e müeslis duain cuntegnair damain zutger en il futur. A Berna èn il Cusseglier federal Alain Berset, producents svizzers da nutriment e represchentants dal commerzi en detagl fixà finamiras cleras.

Duas dunnas vid il solver.
Legenda: Entschaiver il di cun damain zutger, quai empermettan ils producents da jogurt e müesli. Keystone

En media èn da chattar 17 grams zutger en in cup da jogurt. En ina purziun cerealias e müesli èn quai circa 15 grams. Gia avant dus onns, a chaschun da l'Expo a Milaun, eran la Confederaziun ed intgins dals gronds producents da nutriment, sco per exempel Coop, Migros, Emmi e Nestlé, sa cunvegnids da reducir il zutger en lur products.

Quai cun effect. Las controllas da la Confederaziun han mussà che la quantitad media da zutger en ils jogurts è sa reducida dapi lura per circa trais pertschient. Tar las cerealias ed ils müeslis han ins mesirà ina reducziun da tschintg pertschient. In success, di cusseglier federal Alain Berset.

Quai n’è betg nagut. I mussa che la via voluntaria che nus avain tschernì po midar insatge.
Autur: Alain BersetCusseglier federal

Ed uschia duai cuntinuar. Da nov èn ussa era Aldi, Lidl, Kelloggs e Danone da la partida. Enfin la fin dal 2018 duai il zutger el jogurt anc ina giada vegnir reducì per 2,5 pertschient ed en cerealias e müeslis per anc ina giada tschintg pertschient.

RR novitads 17:00