Siglir tar il cuntegn
Inhalt

Svizra Damain purarias – dentant dapli bio

L'onn 2017 haja dà en Svizra 51'620 purarias – quai èn 643 (-1%) pli paucas ch'anc l'onn avant. Persuenter è vegnida augmentada la surfatscha, che mintga puraria cultivescha: Tenor l'Uffizi federal per statistica èn quai en media bun 20 hectaras.

Vatga sin prau en muntogna.
Legenda: Damain purarias, dentant dapli bio: Il trend tar la producziun biologica en l'agricultura cuntinua en muntogna. RTR, Isabelle Jaeger

Las purarias svizras cultiveschan in total da 1,05 milliuns hectaras terren agricul e dattan lavur a 153'900 persunas. Uschia restia il total stabil, scriva l'Uffizi per statistica svizzer en sia communicaziun a las medias.

2 trends cuntinuan: Quel tar bio e quel tar producziun da charn

En Svizra produceschan 6'638 purarias a moda biologica. Quai èn +5% dapli ch'anc l'onn avant. 63% da questas purarias èn en muntogna.

Era il trend da midar sin producziun da charn cuntinuescha tenor l'Uffizi federal per statistica. I dat 3% pli paucas purarias che tegnan vatgas da latg (total 2017: 26'535), persuenter 2% dapli cun muvel per producziun da charn (total 2017:132'398). L'uffizi motivescha quai cun l'economia da latg che na rendia anc adina betg propi bain.

Grischun: Damain bains convenziunals – medem bler bio

Era en il Grischun è il dumber da purarias sa reducì per 47 giu sin 2'318 bains purils. En egl dat, che quels 47 bains èn vegnids cultivads da maniera convenziunala, cun quai che la cifra da bains biologics è restada exactamain tuttina – numnadamain tar 1’300 il 2017 e 1’300 il 2018. Uschia vegnan cultivadas radund 56% da las purarias da maniera biologica.

In sumegliant maletg er tar il terren agricul: La cifra è sa reducida dal 2016 (55’934 ha) per 186 hectaras sin il 2017 (55’768 ha). Malgrà che la surfatscha cultivada è sa reducida è creschida la cifra da terren, che vegn cultivà da maniera biologica dal 2016 (35’014 ha) per 441 hectaras al 2017 (35’455 ha).

RR novitads 12:00