Il remartgabel è che la migraziun sur la mar mediterrana è s’augmentada, scriva il secretariat statala per migraziun. 3171 persunas sajan sin questa via arrivads en l'Italia. La Svizra na saja dentant betg il pajas da destin per ils blers migrants che vegnian en l’Europa.
Emprima instanza ha tractà 2321 dumondas
Il secretariat statala per migraziun ha l'avrigl tractà en emprima stanza 2321 dumondas d'asil. 550 persunas han survegnì asil, 706 persunas han ins ad interim prendì si. Sin 490 dumondas n'è il secretariat betg entrà. 441 da las dumondas sa basa sin la decisiun da la cunvegna da Dublin. L'avrigl han era 558 persunas bandunà la Svizra e quai controllà. 71 persunas èn vegnidas surdadas a las autoritads giudizialas.
Ils pajas d’origin da persunas che dumondan asil en Svizra èn l’Eritrea cun 245 dumondas (-39), suandà da la Siria cun 101 dumonda (-6), la Georgia cun 93 dumondas, l’Afganistan cun 85, la Tirchia cun 69 e l’Algeria cun 55 dumondas d’asil il mais d’avrigl.
Status dad Eritreans vegn examinà
L'uffizi vul examinar 3'200 dossiers dad Eritreans ed Eritreanas che vivan en Svizra cun ina permissiun da dimora transitorica. I sa tracta da persunas ch'èn partì illegal u che han prestà lur obligaziun da servetsch e quels na sajan betg periclitads da vegnir clamads anc ina giada en l'armada. In returnar en lur patria na saja pervi da quai betg insupportabel.
RR novitads 14:00
