Siglir tar il cuntegn
Inhalt

Svizra Da lufs, stallas ed egualitad

Cun las votaziuns finalas ès ida a fin la sessiun da stad a Berna. Dominà questa sessiun han debattas plitost emoziunalas.

Legende: Audio Mezdi: Revista da la sessiun da stad a Berna abspielen. Laufzeit 05:17 Minuten.
05:17 min, Actualitad dals 15.06.2018.

Na a l'autodeterminaziun

La decisiun dal Cussegl naziunal encunter l’iniziativa da la Partida populara svizra PPS è crudada il glindesdi saira tard suenter ina debatta da 9 uras.

Dapli dunnas en il management

Il cussegl naziunal vul dapli dunnas en direcziuns e cussegls d'administraziun. El sustegna ina quantitad directiva da schlattainas per grondas interpresas a la bursa.

Analisas da pajas

Il Cussegl dals chantuns ha decidì dad obligar interpresas cun pli che 100 collavuraturas e collavuraturs da far analisas da pajas. El ha approvà ina mesira cunter la discriminaziun da pajas. Finamira è l'egualitad da paja tranter um e dunna. Actualmain datti ina discriminaziun da paja tranter um e dunna da passa 7%.

Revisiun da la lescha da chatscha

Il Cussegl dals chantuns schlucca las reglas per schluppettar il luf anc pli fitg che quai ch'il Cussegl federal aveva proponì. Las organisaziuns da la protecziun dad animals e da la natira smanatschan cun il referendum. Bain pussaivel ch'il pievel vegn ad avair l’ultim pled en chaussa.

Clavads e stallas senza diever restan vids

Clavads e stallas ch'èn ord funcziun na pon betg vegnir fabritgads enturn en abitaziuns. Quai ha decis il Parlament federal. Il Cussegl dals chantuns ha refusà senza debatta la moziun, adattada dal Cussegl naziunal. L'affar è cun quai per il mument giud maisa.

RR actualitad 12:00