Siglir tar il cuntegn

Svizra Da bellas e bestgas a la Riva

La «Walensee-Bühne» preschenta quest onn «Die Schöne und das Biest». Atgnamain era quel project planisà pir l'onn che vegn. Cun quai che lur local da prova vegn renovà han ils organisaturs stuì anticipar il musical.

La halla polivalenta a Walenstadt vegn renovada quest onn che vegn. Tras quai n’avessan ils chantadurs ed ils musicants nagin local da prova. Perquai han els senza far lungas spustà il musical sin questa stad. En tut datti 21 preschentaziuns, la premiera è ils 20 da zercladur.

24 chantadurs e 16 musicants da tut l'Europa guardan ch'il musical tuna bain. Tar quels vegnan anc vitiers lavurants sin tribuna e divers tecnicists. Las provas cumenzan mez matg. A partir da là enfin la derniera pernotteschan els tar famiglias ospitantas u en abitaziuns da vacanzas.

Il toc «Die Schöne und das Biest»

Personen-Box aufklappenPersonen-Box zuklappen

En il toc vai per in prinzi. Quel era ina giada fitg crudel e grop. Perquai ha ina diala striunà el en ina bestga. El sa mida enavos pir, cur ch'ina dunna ama el.

In di sa perda in commerziant en il chastè da la bestga. Els fan lura ina cunvegna: Il commerziant porta ad el ina da sias figlias. La figlia cun num «Bella» va lura en il chastè. A l'admiratur da Bella na plascha quai dentant betg. El organisescha tut il vitg. Ensemen vulan els assassinar la bestga.

Durant il cumbat bada «Bella», ch'ella è s'inamurada en la bestga. En l'ultim mument confessa ella quai.

Il cumponist tudestg Martin Doepke ha scrit il musical en ils onns 90. Dapi là vegn el adina puspè sin il palc, surtut en Europa. La paraula originala vegn da l'onn 1740 nà da la Frantscha. «La Belle et la Bête» sco paraula la pli veglia da tuttas.

Producziun custaivla

Il budget cumprenda 4 milliuns francs. 90 pertschient da quels ston vegnir cuverts cun vender tickets. Tschintg pertschient, damai 200'000 francs, pajan la vischnanca ed il chantun. Ils ultims 5% vegnan dal sponsoring. Custs elevads chaschuna per exempel il palc. Al Lai Rivaun na datti nagin palc fix. Mintg'onn sto vegnir construì in nov palc.

RR actualitad 07:00