Siglir tar il cuntegn
cuntegn

Svizra Custs da sanadad creschan sin nivel aut

Ils custs da sanadad creschan constantamain e sin nivel aut, quai communitgescha il post per la perscrutaziun da la conjunctura KOF da l’ETH Turitg. Ils custs da sanadad èn creschids per 4,1% sin 84 milliardas francs.

Ina persuna en ina sutga cun rodas.
Legenda: Il 2018 creschan ils custs da sanadad sin passa 10'000 francs ad onn per persuna. Keystone

Sco il post da perscrutaziun da la conjunctura KOF scriva èn ils custs da sanadad creschids per quest onn per 4,1% sin 84 milliardas francs. L’onn che vegn creschan quests custs anc ina giada per 3,9% sin totalmain 87 milliardas francs.

Il 2018 expensas da sanadad per persuna da passa 10’000 francs

Las expensas da sanadad muntassan uschia il 2018 sin passa 10’000 francs per persuna. Ina rolla impurtanta per il creschament da las expensas da sanadad è era il carschen da l’economia. Dapli che las persunas gudognan dapli pon ellas impunder per lur sanadad, scriva il KOF.

Era motivs demografics

Era la cumpart da las persunas pli veglias en Svizra è s’augmentada il 2016. Uschia era las expensas en il sectur da sanadad e quai per 3,8% sin uss radund 80,8 milliuns francs ni sin quasi 9’601 francs per persuna il 2016.

Era quest onn quintan ils experts che la cumpart da persunas pli veglias en la societad vegn a crescher ed era che l’economia vegn a sa revegnir. Sulet ina influenza marginala vegnan ils respargns tras las controllas dals pretschs da medicaments ad avair, scriva il KOF: Uschia quinta il KOF quest onn cun pli autas expensas da sanadad.

RR novitads 14:00