Siglir tar il cuntegn

Svizra Cussegl naziunal vul excepziuns tar la Lex FIFA

Suenter il Cussegl dals chantuns è er il Cussegl naziunal persuenter ch'i dettia excepziuns aifer il dretg penal da corrupziun (era enconuschenta sco «Lex FIFA»). La corrupziun privata na duaja betg adina esser in delict uffizial sco quai ch'il Cussegl federal aveva proponì.

sala dal cussegl naziunal en la chasa federala
Legenda: Il Cussegl naziunal tracta la Lex FIFA. Keystone

Il Cussegl naziunal ha approvà cun 133 cunter 58 vuschs la moziun da Daniel Fässler PCD/AI. La ministra da giustia Simonetta Sommaruga ha fatg attent senza success, che cas levs sajan uschia u uschia prendids or da la persecuziun penala.

Il Cussegl dals chantuns aveva flaivlentà la lescha penala da corrupziun. El ha decidì ch'in delinquent che ha corrumpà persunas privatas vegn persequità sulet sin proposta, sch'il delict na violeschia betg ils interess publics.

Lescha d'alibi

Opposiziun cunter la midada da la lescha vegn da la PPS, lezza n'ha betg vulì entrar en la debatta. Cun la Lex FIFA vegn dà da crair al pievel che nus fetschian insatge, ha ditg Pirmin Schwander PPS/SZ.

La debatta n'è anc betg a fin.

RR novitads 11:00