Siglir tar il cuntegn
Inhalt

Svizra Cussegl naziunal vul adattar il dretg d'armas al dretg da l'UE

Il Cussegl naziunal ha approvà navidas la proposta dal Cussegl federal che vul adattar la lescha svizra a las prescripziuns da l'UE.

um cun ina buis d'assagl da l'Armada Svizra a dies
Legenda: Per la buis d'assagl da l'armada na dovri en la gronda part dals cas betg ina lubientscha speziala. Keystone

A l'Uniun europeica vai principalmain per meglierar il barat d'infurmaziuns e da sminuir il commerzi illegal cun armas. En il focus stattan qua principalmain buis d'assagl cun gronds magasins – ina tala arma è er la buis d'assagl da l'Armada Svizra. Talas buis n'èn tenor il dretg da l'UE betg lubidas senza lubientscha speziala.

Quai ha chaschunà gronda malsegirtad tar tiradurs passiunads, chatschaders, clubs da tir e collecziunaders d'armas. La Svizra ha però pudì sa cunvegnir cun l'UE sin ina regulaziun che armas da l'armada, da chatscha e da la polizia n'èn betg pertutgadas da las midadas dal dretg. Potenzial da conflict cun il dretg da l'UE vesa cussegliera federala Simonetta Somaruga però tar la decisiun dal cussegl naziunal dad insumma betg quintar las armas da l'armada tar las buis betg lubidas.

I va per Schengen / Dublin

Er sche blers cussegliers naziunals n'èran insumma betg fieu e flomma per adattar il dretg d'armas a quel da l'UE n'han els tuttina betg vulì periclitar il contract da Schengen / Dublin cun l'UE. Quel è collià cun l'adattaziun dal dretg d'armas. Tras quai contract ha la Svizra access a las bancas da datas da las polizias europeicas sco er avantatgs economics ed en la politica d'asil.

Sco proxim va la fatschenta ussa en il Cussegl dals chantuns.
Las novas prescripziuns ston vegnir realisadas fin la fin da matg dal 2019. Na capita quai betg smanatscha la fin da la cunvegna da Schengen / Dublin.

RR novitads 20.00