Decidì la recumondaziun han surtut ils burgais en il Cussegl naziunal, entant ch'ils Socialdemocrats ed ils Verds han argumentà persuenter.
Ils arguments or da la debatta
Per adina dapli pensiunads na tanschian las rentas da l’Assicuranza per vegls e survivents (AVS) betg pli per surviver, crititgescha il sindicalist Corrado Pardini da la PS Berna. Per ils pertutgads muntia quai renunziar sin bler e calcular stretg. «Cunzunt dunnas, dentant generalmain tschientmillis persunas cun pajas pli bassas, vegnan uschia chatschadas en la paupradad suenter ch’igl en pensiunadas», uschia Pardini.
4 milliardas francs dapli mintg'onn
L'augment da 10% purtass a persunas che vivan persuls 200 francs ed a pers maridads 350 francs dapli en bursa mintga mais. Per la Confederaziun muntass in gea a l'iniziativa expensas supplementaras da 4 milliardas francs mintg'onn.
Sanar e betg periclitar AVS
Per il liberaldemocrat Bruno Pezzatti da Zug in augment betg supportabel. En vista da las prognosas demograficas alarmantas saja quai ussa necessari da sanar l’AVS e betg da periclitar ina da las pli impurtantas instituziuns socialas da la Svizra. Plinavant funcziuneschia il sistem cun las prestaziuns supplementaras bain e sustegnia precis quellas persunas che hajan basegn.
L’ultim pled en chapitel ha il suveran l'auter onn a l'urna.
RR novitads 12:00/18:00